قررت قبل فترة إني افتح محل بقالة، ولكي ادرس السوق قبل ان اتورط وجدت أحد الأصدقاء لديه عدة فروع وقلت له “بأخذها منك بس شهرين تجربة”. وافق. وكانت تجربة ثرية جدًا ومفيدة لي وحبيت انقل لكم هذه التجربة لعل أحد يستفيد منها.
أنواع تراخيص محلات البقالة
راح ابدأ من الناحية الفنية للتصنيفات الأساسية في مجال البقالة
- البقالة لا تقل عن 50 متر
- التموينات لا تقل عن 100 متر
- الأسواق لا تقل عن 500 متر
وكل صنف له اشتراطات محددة كما هو موضح في الصورة أدناه
بطبيعة الحال اللي أخذتها بقالة ثلاث فتحات بس ما زادت عن 100 متر، فيها عاملين وساكنين حولها، طبعا أنا مسؤول في تلك الفترة عن إيجار سكنهم ورواتبهم، أصبح حضوري يومي من الساعة 4 العصر إلى حوالي 12 بالليل ماعدا يوم الجمعة، دوام طويل ومتعب جدا، نسيت البيت والطلعات والاجتماعات
هامش الربح
الشركات الكبيرة مثل المراعي ونادك والصافي وبيبسي وكوكا كولا وشركات الآيس كريم تعطيك ثلاجة مجانًا بس أنت عليك تشتري الكميات من عندهم أو من المندوب، بعضهم بالآجل وأكثرهم كاش ولا يقبل بالآجل، هامش الربح من الألبان يكاد لا يذكر، كنت أنزل الزبادي مثلا ب 95 هللة وأبيعه بريال (قبل ضريبة القيمة المضافة 15٪) وأنت مجبور تنزله لان الزبون يجد حاجته ولا يطلع من عندك ويده فاضية. واشتركت عند مزودي بطاقات الشحن، حتى هؤلاء ليس لديهم ربح يستاهل. تقريبا كل 1000 ريال يطلع 3 ريال. استبعدت الدخان علشان شبهة الحلال والحرام وكان الزبون إذا ما لقى دخان يطلع ولا يشتري شي وحطيت لوحة عند الباب ( لايوجد دخان)، يعني أكثر ثلاث أشياء تطلب هي الألبان والدخان وسوا وهذي ما فيها هامش ربح يسوى وأنت مضطر توفرها علشان تصير البقالة مكملة وفيها كل شي هامش الربح الحقيقي لقيته في الحلويات والشوكولاته والبلاستيك والمنظفات. يوصل هامش الربح إلى 50٪ تقريبا. يعني لو اشتغلت في الحلويات والشوكولاته بس هامش الربح فيها عالي جدًا. باقي المعروضات مثل البيض والدجاج الطازج وكراتين الماء هامش الربح فيها مقبول نوعا ما.
صافي الربح
البقالات والتموينات عموما صافي الربح فيها يتراوح ما بين ال 15 إلى 18٪ . أما الأسواق فالربح فيها عالي لأنك كل الأقسام الداخلية اللي فيها تقدر تأجرها على غيرك. واحد من الشباب فتح له أسواق ما شاء الله تبارك الله يقول كل الأقسام تغطي الإيجار ومصاريف التشغيل إلى 90٪.
الاعمال اليومية
كنت أروح بسيارتي إلى المستودعات واشتري الناقص كل يومين إلى ثلاثة أيام. تعبت بشكل كبير من المشاوير ويلزم سيارة نقل وتكون فيها ثلاجة علشان نقل الشوكولاته بالجو الحار. لقيت لي كم مندوب ياخذ على كل كرتون من الغازيات والعصيرات ريالين. كل المناديب حاولت فيهم يعطوني بالآجل ويرفضون ولازم كاش. المستودعات لا تقبل الآجل إلا على نطاق ضيق إذا كان السحب منك عالي والتسديد منتظم. حتى أسعار المستودعات تختلف. هذا يبيع الكرتون ب 60 وهذا ب 55 وهذا ب 65. تعبت من التنقل بين هذا وذاك الأفضل يكون عندك سواق خاص ومعه سيارة ويروح يجيب احتياجات البقالة كل يوم أو كل يومين وريح راسك. المناديب اللي يشتغلون لحسابهم الخاص يوقفون عند البقالة ويعرضون عليك المنتجات بأسعار مرتفعة شوي كاستغلال لحاجتك ولا تروح بنفسك حنا نجيك
مصاريف اخرى
فواتير الكهرباء مرتفعة في الصيف بسبب التكييف والثلاجات توصل شهريا إلى حوالي 1200 ريال، هذا غير مصاريف التلفون والدباب ومشاكله والصيانة المستمرة للبقالة.
منتجات رخيصة ولكن
فيه مستودعات تبيع بضائع معروفة ومخفضة بسبب قرب انتهاء الصلاحية ويطيح فيها حوالي 50٪ من سعرها. هي فرصة كبيرة وأشوف فيه محلات كثيرة تشتغل فيها. بس يلزمك تضمن تصريف البضاعة قبل الانتهاء وتحطها في مكان بارز أو الله يعينك على الخسائر وعلى الغرامات من جهات الرقابة
السيطرة والتحكم
العمل في البقالة أو التموينات أو الأسواق ممتع وجميل لكن ساعات العمل طويلة جدًا والمتابعة فيها متعبة ومرهقة ولا تقدر تسيطر. وضعت برنامج محاسبي متطور وكاميرات مراقبة ولكن ما قدرت اضبط عملية السرقات البسيطة .يعني لو يأخذ العامل كل يوم حبة جالكسي أو بيبسي ما تدري والسبب إن شركات التموين إذا جت مثل المراعي ما يحط لك اللي تبي. يحط لك زيادة من اللي عليه طلب وينقص من غيره ويبدل منتجات ثانية. يعني حتى ضبط عملية كم راح من حبة وكم بقي ما تقدر تسيطر عليها. يعني هي على أمانة العامل. لو بغى يسرقك كل يوم بشي بسيط ما دريت
الخلاصة
تجربة الشهرين كانت مفيدة وثرية جدًا في مجال تجزئة المواد الغذائية والتشغيل فيها عالي جدًا، إذا كنت متفرغ للعمل ولا عندك ارتباطات عائلية انصحك فيها بس تجي من الفجر إلى الظهر ومن العصر إلى الساعة 12 بالليل يوميًا ، وأنا متأكد إن صافي الربح عندك بيكون شي كبير تتعب في أول سنتين وتكبر وتوسع المكان وتزيد العمالة وتصير الشركات هي اللي تبحث عنك وتدورك تدري إن بعض الشركات تعطيك مبلغ شهري وهي اللي تدفع لك إيجار مكان ثلاجتها إذا كان سحبك عالي؟
انفض غبار ثوبك واشتغل واجتهد، تسعة أعشار الرزق في التجارة ونسأل الله لك التوفيق والنجاح
انتهى
